Isomo rya mbere : lntg 3, 9-15

Igitabo cy’Intangiriro

Muntu yamaze gusuzugura Imana, ⁹maze Uhoraho Imana aramuhamagara, aramubaza ati «Uri hehe?» ¹⁰Undi arasubiza ati «Numvise ijwi ryawe mu busitani, ngira ubwoba kuko nambaye ubusa ndihisha.» ¹¹Uhoraho Imana ati «Ni nde waguhishuriye ko wambaye ubusa? Aho ntiwariye ku giti nari nakubujije kuryaho?» ¹²Muntu arasubiza ati «Umugore wanshyize iruhande ni we wampaye kuri cya giti ndarya.» ¹³Uhoraho Imana abwira umugore ati «Wakoze ibiki?» Umugore arasubiza ati «lnzoka yampenze ubwenge ndarya.» ¹⁴Uhoraho Imana abwira inzoka ati «Kuko wakoze ibyo, ubaye ruvumwa mu nyamaswa zose z’agasozi, uzakurura inda hasi maze urye umukungugu iminsi yose y’ukubaho kwawe. ¹⁵Nshyize inzigo hagati yawe n’umugore, hagati y’urubyaro rwawe n’urubyaro rwe; ruzakujanjagura umutwe. Nawe urukomeretse ku gatsinsino.»

Kuzirikana : Zab 130 (129),12,3-4, 5-6ab, 7bc-8

ZABURI

• Inyik/Nyagasani ahorana imbabazi,
•           akagira ubuntu butagira urugero.

• Uhoraho, ndagutakambira ngeze kure,
• Uhoraho, umva ijwi ryanjye.
• Utege amatwi ijwi ry’amaganya yanjye!

• Uhoraho, uramutse witaye ku byaha byacu,
• Nyagasani, ni nde warokoka?
• Ariko rero usanganywe imbabazi,
• kugira ngo baguhoranire icyubahiro.

• Nizeye Uhoraho n’umutima wanjye wose,
• nizeye Ijambo rye.
• Umutima wanjye urarikiye Uhoraho,
• kurusha uko umuraririzi ategereza umuseke.

• Kuko Uhoraho ahorana imbabazi,
• akagira ubuntu butagira urugero,
• ni we uzakiza Israheli ibicumuro byayo byose.

Isomo rya kabiri : 2 Kor 4, 13 – 18 ; 5, 1

Ibaruwa ya kabiri Mutagatifu Pawulo Intumwa yandikiye Abanyakorinti

Bavandimwe, ^4,13Ubwo dushyigikiwe n’ukwemera kw’Ibyanditswe bivuga biti «Naremeye bintera kwamamaza», natwe turemera ikaba ari yo mpamvu twamamaza. ¹⁴Koko turabizi, Uwazuye Nyagasani Yezu natwe azatuzurana na We, kandi twese azatwakire iruhande rwe. ¹⁵Ibyo byose ni mwe bigirirwa kugira ngo musenderezwe ineza y’Imana, maze murusheho kuba benshi bashimira Imana bayihesha ikuzo. ¹⁶Ni cyo gituma tudacogora; kabone n’ubwo umubiri ugenda uyonga, umutima wo wivugurura buri munsl. ¹⁷Kandi n’amagorwa yacu muri iki gihe gihita nta cyo adutwaye, uyagereranije n’ikuzo adutegurira ry’akataraboneka kandi rizahoraho. ¹⁸Bityo tukaba tutarangamiye ibigaragara, ahubwo ibitagaragara, kuko ibigaragarira amaso bihitana n’igihe, naho ibitagaragara bigahoraho iteka. ^5,1Tuzi neza ko uyu mubiri utubereye nk’icumbi kuri iyi si. Umunsi ryasenyutse tukazimukira mu ngoro ihoraho yo mu ijuru, itubatswe n’ukuboko k’umuntu, ahubwo yubatswe n’Imana.

Ibango-ndirimbo ribanziriza Ivanjili : Hish 12, 10 ; Yh 12, 32

Alleluya Alleluya.

• Ngiki igihe cy’ubucunguzi bw’Imana yacu n’ubutegetsi bwa Kristu Wayo kirageze;
• Umwana w’umuntu wererejwe ku musaraba, arareshya bose Abiyegereza.
<


Ivanjili Ntagatifu : Mk 1,20-35




+ Mariko

Muri icyo gihe, Yezu n’abigishwa be ²⁰bageze imuhira, abantu benshi bongera guterana bituma badashobora kugira icyo barya. ²¹Nuko bene wabo wa Yezu babyumvise baza kuhamuvana; kuko bavugaga ngo «Yasaze!» ²²N’abigishamategeko bari bavuye i Yeruzalemu baravugaga ngo «Yahanzweho na Belizebuli!», kandi ngo «Umutware wa roho mbi ni we yirukanisha roho mbi!» ²³Nuko abakoranyiriza iruhande rwe, ababwirira mu migani ati «Sekibi yabasha ate kwiyirukana? ²⁴Ingoma yibyayemo amahari ntishobora gukomera. ²⁵N’umuryango wabyaye amahari, na wo ntushobora gukomera. ²⁶Niba rero Sekibi yirwanya akicamo ibice ntaba agikomeye, ake kaba kashobotse! ²⁷Kandi nta muntu ushobora kwinjira mu nzu y’umunyarnaboko ngo asahure ibintu bye, atabanje kuboha uwo munyamaboko, hanyuma ngo abone uko asahura inzu ye. ²⁸Ndababwira ukuri, abana b’abantu bazakizwa ibyaha byose bakoze, ndetse n’ibitutsi batutse Imana. 29 Nyamara uzaba yaratutse Roho Mutagatifu nta bwo azagirirwa imbabazi bibaho; ahubwo azashinjwa igicumuro cye iteka.» ³⁰Yezu yababwiye ibyo, abitewe n’uko bavugaga ngo «Yahanzweho na roho mbi.»

³¹Nyina wa Yezu n’abavandimwe be baraza bahagarara hanze, bamutumaho ngo aze babonane. ³²Abantu benshi bakaba bicaye bamukikije. Baramubwira bati «Dore nyoko n’abavandimwe bawe bari hanze baragushaka.» ³³Arabasubiza ati «Mama ni nde, n’abavandimwe banjye ni bande?» ³⁴Nuko azengurutsa amaso mu bari bicaye bamukikije, aravuga ati «Dore mama, dore n’abavandimwe banjye. ³⁵Umuntu wese ukora icyo Imana ishaka ni we muvandimwe wanjye, ni we mushiki wanjye kandi ni we mama.»

---