Isomo rya mbere : 1 Bam 17, 17-24

Igitabo cya mbere cy’Abami

Mu rugo umuhanuzi Eliya yabagamo, ¹⁷umwana w’uwo mugore nyir’urugo yararwaye. Indwara ye irakomera ku buryo yamuhitanye. ¹⁸Umugore abwira Eliya ati “Mpfa iki nawe muntu w’Imana ? Ese wazanywe iwanjye no kwibutsa Imana icyaha cyanjye, ngo wicishe umwana wanjye ?” ¹⁹Eliya aramusubiza ati “Mpa umwana wawe !” Amumukura mu gituza, aramufata amujyana mu nzu yo hejuru yararagamo, amuryamisha ku buriri bwe. ²⁰Hanyuma atakambira Uhoraho agira ati “Uhoraho Mana yanjye, ese urashaka kugirira nabi uyu mupfakazi wancumbikiye, umwicira umwana ?” ²¹Eliya arambarara gatatu hejuru y’umwana, maze atakambira Uhoraho agira ati “Uhoraho Mana yanjye, umwuka w’uyu mwana numugarukemo !” ²²Uhoraho yumva ijwi rya Eliya, maze umwuka w’umwana umugarukamo asubirana ubuzima. ²³Eliya afata umwana, amukura mu nzu yo hejuru aramumanukana amuhereza nyina. Eliya aravuga ati “Dore umwana wawe ni muzima.” ²⁴Umugore abwira Eliya ati “Yego, noneho ubu menye ko uri umuntu w’Imana, kandi ko ijambo ry’Uhoraho uvuga ari ukuri.”   

Kuzirikana : Zab 30 (29), 3-4, 5-6ab, 6cd-12, 13

ZABURI

Inyik/ Ndakurata Uhoraho, kuko wampaye kwegura umutwe.

• Uhoraho Mana yanjye, naragutakiye maze urankiza ;
• Uhoraho, wanzamuye ikuzimu,
• maze ungarurira kure nenda gupfa.

• Nimucurangire Uhoraho, mwebwe abayoboke be,
• mumwogeze muririmba ubutungane bwe ;
• kuko uburakari bwe butamara akanya,
• naho ubutoneshe bwe bugahoraho iteka.

• Ijoro ryose riba amarira gusa,
• ariko igitondo kigatangaza impundu z’ibyishimo.
• Nuko amaganya yanjye uherako uyahindura imbyino,
• ikigunira nari nambaye ugisimbuza imyenda y’ibirori.

• Ni yo mpamvu umutima wanjye uzakuririmba ubudatuza,
• Uhoraho Mana yanjye, nzagusingiza iteka ryose.

Isomo rya kabiri : Gal 1, 11-19

Ibaruwa Mutagatifu Pawulo Intumwa yandikiye Abanyagalati

¹¹Mbibamenyeshe rero bavandimwe, iyo Nkuru Nziza nabigishije si iy’umuntu, ¹²si n’umuntu nyikesha kandi si umuntu wayinyigishije : ni Yezu Kristu wayimpishuriye. ¹³Mwumvise kandi imigirire yanjye kera nkiri mu kiyahudi : ko natotezaga bikabije Kiliziya  y’Imana nshaka kuyitsemba. ¹⁴Kandi benshi mu bo tungana dusangiye n’ubwoko, nabarushaga gukurikiza idini ya kiyahudi, nkabasumbya ishyaka ryo guharanira umuco karande w’abasokuruza.

¹⁵Nyamara umunsi Uwanyitoranyirije nkiri mu nda ya mama, yampamagaye ku bw’ineza ye ¹⁶ngo ampishurire Umwana we kugira ngo mwamamaze mu mahanga, ako kanya nahise mpaguruka nta we niriwe ngisha inama, ¹⁷habe no kuzamuka i Yeruzalemu ngo nsange abantanze kuba intumwa ; ahubwo nagiye muri Arabiya, nyuma ngaruka i Damasi. ¹⁸Nyuma y’imyaka itatu ni bwo nazamutse i Yeruzalemu kureba Petero, tumarana iminsi cumi n’itanu. ¹⁹Nta yindi ntumwa twabonanye, uretse Yakobo umuvandimwe wa Nyagasani.

Ibango-ndirimbo ribanziriza Ivanjili : Lk 7, 16

Alleluya Alleluya.

• Umuhanuzi ukomeye yaduturutsemo :
• Imana yasuye umuryango wayo.

Alleluya.

Ivanjili Ntagatifu : Lk 7, 11-17

+ Luka

Muri icyo gihe, ¹¹Yezu arakomeza ajya mu mugi witwa Nayini.

Abigishwa be n’abandi benshi baramukurikira. ¹²Ngo agere hafi y’irembo ry’umugi, ahura n’abahetse umurambo bajya guhamba umuhungu w’ikinege, nyina akaba yari umupfakazi ; kandi abantu benshi bo muri uwo mugi bari bamuherekeje. ¹³Nyagasani amubonye amugirira impuhwe ; aramubwira ati”Wirira !” ¹⁴Nuko yegera ikiriba agikoraho, abari bagihetse barahagarara. Aravuga ati “Wa musore we, ndabigutegetse haguruka !” ¹⁵Nuko uwari wapfuye areguka aricara, atangira kuvuga. Yezu amusubiza nyina. ¹⁶Bose ubwoba burabataha, basingiza Imana bavuga bati “Umuhanuzi ukomeye yaduturutsemo, kandi Imana yasuye umuryango wayo.” ¹⁷Iyo nkuru isakara muri Yudeya yose, no mu gihugu cyose kiyikikije.