Amasomo :
Iz 43, 16-21
Zab 126 (125), 1-2b, 2c-3, 4-5, 6
Fil 3, 8-14
Yh 8, 1-11

Inyigisho yo mu misa y’abana.

Abana Mwaramutse, mumeze mute ? Ese muzi izina ryanjye ? Turi ku cyumweru cya kangahe cy’ igisibo ? Mu Ivanjili mwumvise iki ? Mu Kiliziya ntabwo abana baganira. Birabujijwe kubikora, nimubikora Imana irabahana. Amasomo  y’uyu munsi ni aya bakuze, kuko  abana bakeneye igikoma, si ifungoro rikomeye.

Isomo rya mbere umuhanuzi Izayi atubwira ko Uhoraho azahindura byose. Ako kazi n’umukiza wacu yaragakoze. Kuko mu rupfu rwe n’izuka rye yatugize abantu bashya. Yezu ni we soko ry’ubuhindagurike bwose. Ni yo impamvu mu isomo rya kabiri, Yezu yahinduye ubuzima bwa Pawulo Mutagatifu, ubuzima bwe yabugize igitambo kugira ngo yamamaze Inkuru Nziza.

Mu Ivanjiri, twumvise ko abigishamategeko n’abafarizayi bafashe umugore asambana, bamushyira hagati, babwira Yezu bati : Mwigisha, uyu mugore bamufashe asambana. Mu mategeko, Musa yadutegetse kwicisha amabuye abagore nk’aba. Wowe se ubivugaho iki ? Akarengane  ka mbere, kuki bafashe umugore wenyine kandi bari babiri. Umugabo yari hehe ? Nukuvuga ko abigishamategeko nabo batari intungane.

Ahubwo ni Abanyabyaha baciriye urubanza undi munyabyaha, kandi bashaka no  kumwica. Yezu ababwira ko ibyo bidashoboka. Ni yo impamvu Yezu ababwira ati « muri mwe udafite icyaha ngaho namubanze ibuye ». Babyumvise batangira kugenda umwe umwe bahereye ku basaza.

Abigishamategeko babonye ko uriya mugore ari umunyabyaha ariko bo ntibabone amakosa yabo. Ni cyo cyatumye Yezu avuga ati : « kuki ubona akatsi kari mu jisho ry’umuvandimwe wawe, ariko umugogo uri mu jisho ryawe ntuwubone ? mbere yo gucira abandi urubanza ni  byiza ko natwe tubanza kwisuzuma :

• Niba uvuze uti uyu ni umusambanyi, ese wowe uri umumalayika ? ese nta bwo ubizi ? ese nta bwo ubyifuza ? cyangwa nta bwo ubitekereza ?
• Niba uvuze uti uyu mukobwa afite inda kandi nta mugabo afite, urimo kwishimira ibyago bye, nawe uracyari inkumi, uritonde kuko nawe ejo ushobora guhura nabyo.
• None rero bavandimwe niba tubonye umuvandimwe wacu aguye, tumugirire imbabazi, kuko mu kinyarwanda bavuga bati : aho umugabo yaguye uterera ho utwatsi.

Rimwe na rimwe dusa n’abigishamategeko, kuko tureba gusa amakosa y’abandi. Niyo mpamvu mu kinyarwanda bavuga bati : banegurana ari inenge, bakongera kuvuga bati ba nenge itirora.

Yezu atwigishije ko atari byiza kwihutira gucira abandi urubanza. Umukiza wacu yanga icyaha ntiyanga umuntu wakoze icyaha. Abwira uwo mugore ati uherukire aho gucumura ukundi. Nta bwo yamubwiye ngo genda ukore icyo ushaka.

P Simplice, MAfr