Inyigisho ya 1 yo ku cyumweru, icyumweru cya 4 cya Pasika, C

Paruwasi Mutagatifu Petero Cyahafi


Amasomo
Intu 13, 14.43-52
Zab 100 (99), 1-2, 3, 5
Hish 7, 9.14b-17
Yh 10, 27-30

 

Padiri SimpliceIsomo rya mbere, Pawulo na Barinaba bakomezaga kwamamaza Inkuru Nziza. Bari bafite abantu benshi, babatega amatwi. Kubera ibyiza Imana yabakoreye, abayahudi babagiriraga ishyari. Turabona ko Pawulo na Barinaba birukanywe kubera ishyari. Nta kintu kibi bari bakoze.

Isomo rya kabiri, riratubwira ko abahowe Imana bakwiye kuguma iruhande rwa Data. Kuko batotezwa kubera urukundo rw’Imana. Baciye mu bigeragezo byose ku isi. None bageze mu bwami bw'Imana bari barasezeranijwe. Nta nzara, nta nyota, nta mubabaro, nta n'ubukwe bibayo. Kugira ngo natwe tuzajyeyo, tugomba guheka imisaraba yacu hano ku isi. Wabyaye ikimuga, niwo musaraba wawe ugomba kuwutwarana umunezero, umugabo wawe ni umusinzi ugomba kumwitaho, kuko niwo musaraba wawe, umugore wawe ariyandarika, mufashe niwo musaraba wawe.

Mutagatifu Yohani aratwibutsa ko ntawakunda Imana adakunda bagenzi be. Wowe  aho utuye wakora iki ngo urusheho kugira icyo umarira abandi ? Biragoye kubona urukundo nyakuri, ariko Yezu yaduhaye urugero aratubwira ati : Nimukundane nk’uko nanjye nabakunze.

Invanjili itumenyesha ko Yezu ari we mushumba mwiza. Umushumba mwiza ni nde ? ni utanga ubuzima bwe kugira ngo arinde intama ze. Ni utabara intama ze. Umushumba mwiza nta kintu na kimwe cyatuma areka intama ze. Hari bamwe na bamwe mu bashumba bita ku ntama zabo. Ariko abenshi mu bashumba iyo bahuye n’ibigeragezo bata intama zabo.

Urugero habayeho abapadiri batatu bari muri paruwasi yabo, intambara iratera, bashaka guhunga, mu gihe bashyiraga ibintu mu modoka yabo, Umuhereza, arababaza ati mugiye hehe ? Baramusubiza bati tugiye mu kindi gihugu. Arababwira ngo  bategereze gato, ajya mu kiliziya, ahita afungura  taberinakuro, yafashe inkongoro n’ukaristiya arabashyira ati : mubijyane byose ntitukibakeneye hano. Maze Abapadiri baratekereza, baravuga bati ntidushobora kugenda, ntidushobora kubasiga, bagumaho kugeza ku rupfu. Niyo mpamvu Yezu atubwira ko nta rukundo rwaruta urwo gutanga ubuzima ugirira abo ukunda. Urukundo rw’Imana rugaragarira mu bikorwa.

Ese natwe tuyobora imiryango yacu nk’uko abashumba beza babigenza? Buri wese azi ukuntu ayobora mu rugo rwe, azi niba ari umushumba mwiza cyangwa wa wundi ukubita intama ze igihe cyose, cyangwa aragira intama ze ahatari ubwatsi bwiza. Urugero : uri  umugabo  niba unyoye amacupa ane hanze kandi  abo mu rugo bicwa n’inzara, nta bwo uri umushumba mwiza. Ahubwo ukwiye guhanwa. 

Ishusho y’intama, isobanura iki ? Hano bitwereka ko tugomba kwiyumanganya muri byose kubera Nyagasani Imana yacu. Intama iriyumanganya muri byose, ntisakuza cyane,  rimwe na rimwe turavuga tuti uyu umuntu  ni intama, dushatse kuvuga ko yitonda cyane.

 Dufite umushumba, umutabazi umwe ni Yezu, ni we uturinda ibirura. Ariko ikirura gikomeye ni Sekibi. Umushumba mwiza n'intama ze baramenyana. Niba intama zimwe na zimwe zivuye mu bushyo zirahura n’ingorane zikomeye.

Twebwe abakristu turagiwe n’Umushumba mwiza, Uhoraho, nta cyo tuzabura, atuyobora inzira y’ubutungane. Dusabe Nyagasani Imana yacu adutabare aho dufite intege nke kugira ngo atwinjize  mubwami bwe hamwe na Yezu, we mushumba mwiza.

P Simplice, MAfr





Byanditswe : tariki ya 19 Gicurasi 2016 saa 12:05:04, ubu
Uwabitangaje : Saint Pierre CYAHAFI

֩ Ibitekerezo kuri iyi nkuru (0)

Nta gitekerezo kiratangwa kuri iyi nkuru, tanga agatego ube uwa mbere kugira icyo ubivugaho

Umugenzuzi

Funga Amazina:

Ijambo ry'ibanga:

Ohereza igitekerezo

Funga       
     

-
-


B I U URL    :) :( :P :D :S :O :=) :|H :X :-*

Ohereza ifoto (itarengeje 200 kb), ariko si ngombwa

Andika iri jambo ry'igenzura:   4fb61