Amasomo :
Intu 1, 1-11
Zab 47 (46), 2-3, 6-7, 8-9
Heb 9, 24-28; 10, 19-23
Lk 24, 46-53

Isomo rya mbere n’irya kabiri atwigisha ko ari ngombwa ko tunyura mu magorwa menshi, kugira ngo tubone kwinjira mu ngoma y’Imana. Imbonekerabusa niyo mburira busa. Bavandimwe tugomba kwakira imibabaro, bijyane n’ukwemera kwacu.

Ivanjiri y’uyu munsi iradutumira ngo tuzirikane ku rukundo rw’Imana ku bantu n’urukundo rw’abantu hagati yabo. Dore  itegeko rishya Yezu yaduhaye : nimukundane, kandi mukundane nk’uko nabakunze. Mbese Yezu yadukunze gute ? Mu kinyarwanda baravuga bati : abakundanye barajyana. Yezu yaradukunze agumana natwe, ntiyadusize nk’impfubyi. Ari kumwe natwe mu masakaramentu, cyane cyane muri Ukaristiya.

Urukundo rutera rimwe na rimwe umubabaro. Mu rukundo byose nta bwo ari ubuki, hari kandi inzuki. Muzi uko bigenda iyo uruyuki rukudwinze, urababara. Bityo Umwami wacu kubera urukundo yari adufitiye, yabonye iminsi y’amahirwe. Ariko yahisemo kubabara   kugira ngo adukize, kugira ngo aduhe ubugingo bw’iteka.

Nkuko tubizi urukundo nyarwo, nta bwo rwirata, ruriyumanganya, rwihanganira byose. Urukundo rw’Imana rugaragara mu bikorwa, n’ubwo abantu benshi bashidikanya muri iyi minsi, igihe bari mu bigeragezo. Urugero iyo umuntu apfuye akiri muto, umubyeyi we aribaza, ese Imana irankunda koko ? Ese urukundo rw’Imana rubaho ? Urukundo rw’Imana nta bwo ari ikibazo cy’igitangaza, ahubwo n’ikibazo cy’impuhwe, cy’imbabazi

Mbese,twebwe dushobora kugaragaza urukundo rw’Imana Data mu buzima bwacu gute ? Mu kinyarwanda baravuga bati : uguha akubonye aruta n’ukuzirikana, cyangwa ndaguha iruta ndagukunda. Bisobanura iki ? Urukunko rugaragara mu bikorwa nta bwo ari mu ma gambo. Dufite amahirwe ko hari abantu barimo gushyira urukundo rw’Imana mu bikorwa. 

Urugero : Iyi nkuru ngiye kubabwira si amateka. Hari umugabo yari afite umugore n’abana, ariko umunsi umwe yagize ikosa rikomeye, baramufashe, bamucira urubanza, bamukatira urwo gupfa . Hari umupadiri witwa Maximilien yumva ko uwo mugabo agiye gupfa asize umugore n’abana, yagiye kwinginga abacamaza ngo apfe mu mwanya w’uyu mugabo. Barabyemeye bahitamo kwica Padiri Maximilien. Ibyo yabikoze kubera urukundo rw’Imana. Umuntu udafite urukundo  rw’Imana nta bwo ashobora kwitanga kugira ngo akize abandi.

Umuntu wese uvuga ati ndi umukristu ahamagariwe kwera imbuto y’urukundo aho ari hose. Ni byiza ko tumenya ko tutagomba kubabaza abavandimwe bacu. Mu kinyarwanda baravuga bati : ikibuye cy’ineza ntikivuza ubuhuha. Ibintu byose tugomba gukora ni byiza ko tubikora mu rukundo. Bityo tuzi ko turimo gukora ugushaka kw’Imana. Kuko Imana ni urukundo nta bindi.

P Simplice, MAfr