Isomo rya mbere : Iz 7, 10-16

Isomo ryo mu gitabo cy’Umuhanuzi Izayi

Uhoraho yohereza umuhanuzi Izayi ¹⁰kubwira umwami Akhazi ati ¹¹«Saba Uhoraho Imana yawe aguhe ikimenyetso, cyaba icyo hasi ikuzimu, cyangwa se icyo hejuru mu kirere.» ¹² Akhazi arasubiza ati «Nta cyo nsabye, kandi sinshaka no kwinja Uhoraho.» ¹³Nuko Izayi aravuga ati «Tega amatwi rero, muryango wa Dawudi! Mbese ntibibahagije kunaniza abantu, kugira ngo mube mutangiye no kunaniza Imana yanjye ? ¹⁴Noneho rero ni Nyagasani ubwe uzabihera ikimenyetso: Dore ngaha umwari asamye inda, akazabyara umuhungu maze akazamwita Emanuweli. ¹⁵Azatungwa n’amata y’ikivuguto n’ubuki, kugira ngo azabashe kwanga ikibi, ahitemo icyiza. ¹⁶Na mbere y’uko uwo mwana azabasha kwanga ikibi agahitamo icyiza, ibihugu by’abo bami bombi utinya, bizaba bitakivugwa.»

Kuzirikana : Zab 24 (23), 1-2, 3-4ab, 5-6

ZABURI

• Inyik/ Uhoraho naze :
• ni we mwami wuje ikuzo

• Isi ni iy’Uhoraho hamwe n’ibiyirimo,
• yose ni iye hamwe n’ibiyituyeho byose.
• Ni we wayitendetse hejuru y’inyanja,
• Anayitereka hejuru y’inzuzi ubutayegayega.

• Ninde uzazamuka ku musozi w’Uhoraho,
• Maze agahagarara ahantu he hatagatifu ?
• Ni ufite ibiganza bidacumura n’umutima usukuye,
• ntararikire nabusa ibintu by’amahomvu.

• Uwo azabona umugisha w’Uhoraho,
• N’ubutungane bukomoka ku Mana umukiza we.
• Bene abo nibo bagize ubwoko bw’abamushaka,
• bagashakashaka uruhanga rwawe, Mana ya Yakobo.

Isomo rya kabiri : Rom 1, 1-7

Intangiriro y’ibaruwa Mutagatifu Pawulo Intumwa yandikiye Abanyaroma

Bavandimwe, ^ljyewe Pawulo umugaragu wa Yezu Kristu, ndabaramutsa. Koko natorewe kuba intumwa, nteganyirizwa kwamamaza Inkuru Nziza ²Imana yari yarateguje abahanuzi bayo mu byanditswe bitagatifu. ³Iyo Nkuru Nziza yerekeye Umwana wayo, Yezu Kristu Umwami wacu, wabayeho ku bw’umubiri ari mwene Dawudi, ⁴ariko izuka rye ava mu bapfuye rikagaragaza ko ari Umwana w’Imana, mu bubasha bwose ku bwa Roho Mutagatifu. ⁵Ni na We waduhesheje ubutumwa, bwo kuyobora mu ikuzo ry’izina rye amahanga yose ku kwemera, ⁶ari yo mubarirwamo namwe, abahamagawe na Yezu Kristu. ⁷Mwebwe rero batoni b’Imana muri i Roma, mwebwe abatagatifujwe no gutorwa n’Imana: nimugire ineza n’amahoro bituruka ku Mana Umubyeyi wacu, no kuri Nyagasani Yezu Kristu.

Ibango-ndirimbo ribanziriza Ivanjili :

Alleluya Alleluya.

• Dore umukobwa w’isugi agiye gusama inda,
• maze azabyare umuhungu,
• nuko bazamwite «Emanuweli»,
• ari byo kuvuga ngo «Imana turi kumwe&raq
  

  Ivanjili Ntagatifu : Mt 1, 18-24

  
  

  + Amagambo yo mu Ivanjili ntagatifu uko yanditswe na Matayo
  

  ¹⁸Dore uko Yezu Kristu yavutse. Nyina Mariya yari yarasabwe na Yozefu; mu gihe batarabana aza gusama inda ku bubasha bwa Roho Mutagatifu. ¹⁹Yozefu umugabo we wari intungane kandi utashakaga kumuteza urubwa, yigira inama yo kumusezerera rwihishwa. ²⁰Igihe yari akibizirikana, Umumalayika wa Nyagasani amubonekera mu nzozi aramubwira ati «Yozefu mwana wa Dawudi, witinya kuzana umugeni wawe Mariya, kuko yasamye ku bubasha bwa Roho Mutagatifu. ²¹Azabyara umwana uzamwite Yezu, kuko ari we uzakiza umuryango we ibyaha byawo.» ²²Ibyo byose ariko byabereye kugira ngo huzuzwe ibyo Nyagasani yavugishije umuhanuzi ati ²³«Dore Umukobwa w’isugi agiye gusama inda maze azabyare umuhungu, nuko bazamwite «Emanuweli», ari byo kuvuga ngo «Imana turi kumwe». ²⁴Yozefu akangutse abigenza uko Umumalayika wa Nyagasani yamutegetse, nuko azana umugeni we.

  ---